ขับร้องโดย เมกขะหลา สะถาพอน

แต่งกลอน ดาวเวียง บุดนาโถ

         อ่ำถ่ำ แก้มอ้ายอ่ำถ่ำ อ้ายเอาเมียหมอลำ บ่ย้านลูกอ้ายก่ำบ่น้อ...อือ.. อ้าย

         เอ้อ... เออ อื้อฮือ.. ละอื้อฮือ ... เอย

         แม่นว่า สีพันดอนแดนใต้ สิไขกลอนเป็นจักหว่าง เป็นเสียงลำภาคใต้ ลำให้ทุกท่านฟัง เว้าถึงความมั่งคั่งอุดมหั่งสวยงาม สีพันดอนลือนาม ซ่าเซงซัยก้อง สมซื่อคนขานย้องสีพันดอนใต้ต่ำ งามหมู่ธรรมชาติเชื้อเครือไม้ตาดพะเพ็ง เสียงสาดดังเป้งๆ น้ำโตนตาดหลี่ผี มีมนต์ขลังเสน่ห์ฮักชักชวนไปยามยื้อ

        แม่นว่า.. อันว่าลือลือก้อง เป็นเสียงกลองก้องส่า เป็นอู่ปลาอู่เข้าอุดมด้วยหมู่ปลา มีปลาเอิน ปลาค้าว ปลาหว่า ปลาพอน สีพันดอนค้างหม้อไว้ ปลาเต้นขึ้นใส่เอง เมื่อหาปลามาได้ มีอ๋อแกง ปิ้งจี่ มีแจ่วบี แจ่วส้ม หมกต้ม ป่นปลา มีทั้งลาบและก้อย ซอยแซ่ผักพัน กินทั้งเผ็ดทั้งมันจนเหื่อไหลไคลย้อย

        ลอยลงเฮือชมพื้นอุดมดี ผู้มีค่าหลากหลายตามหล่างน้ำอุดมด้วยหมู่ดอน ดอนโขงยาวใหญ่ก้วง ลอยเด่นกลางของ ยามน้ำนองฟองเฟือนตลิ่งซันซงย้าน ดอนถาน ดอนวิมานพร้อม มีดอนเรียงเคียงคู่ อยากได้ซู้ต่างบ้านขี่เฮือข้ามล่องลอย

        ดอนกอยงามกาบเอ้ ประดับพืชแนวพันธุ์ มีพร้าวตาลแนวหวาน ม่วงมันลำไยนี่ มีทั้งดอนสรรสร้าง บักโมหวานเขาส่า ดอนนางงอย คอยหม่อมอ้ายไปเป็นซู้สู่ซม ดอนสวนพั้วดอกอ้มสมซ่าคนขาน มีดอนแอน ดอนตาล ด่านแดนคนใต้

        เอ้อ... เออ อื้อฮือ.. ละอื้อฮือ ... เอย

        แม่นว่า คายค่ำแลงลงค้อย รัตติกาลเดือนแจ่ม แนมเห็นเดือนเกลื่อนฟ้า นภาแจ้งแจ่มใส อ้ายบ่าวเลาะเล่นบ้าน เป่าปี่สีซอ เสียงออแอประสานแคน เกี้ยวสาวตามบ้าน เสียงหวานๆ ลำใต้ สีพันดอนดังหว่อน วอนหาซู้ฮักเต้ย ไปนอนลี้อยู่ไส

       ลำว่าอ้ายฮักน้อง ฮักกว่าหญิงใด สาวไทไกลบ่เคยสน ฮักแต่สาวไทบ้าน แต่ว่าเมื่อมาฮอดนี้ สีพันดอนสิลาก่อนเด้อท่านผู้ฟังเอย อยากได้แฟนหมอลำให้เด่มือมาทางพี้ ครั้นบ่ติหมอลำใต้ คนบ่งามหน้าก่ำ เชิญอ้ายมาแวะเล่นกินก้อยปลาพอน อ่อนๆ แก้มอ้ายอ่อนๆ มันสมควรพอลงสิโจ๊ไว้สาก่อน ขอลาแล้ว...